என் நாமம் தரிக்கப்பட்டிருக்கிற என் ஜனங்களே நான் உங்களை எனக்கு சொந்தமாகத் தெரிந்து கொண்டேன். என்னுடைய இரத்தத்தினாலே உங்களை சுத்திகரித்து என்னுடைய நீதியை உங்கள் மேல் விளங்கப்பண்ணி என்னுடைய நாம மகிமைக்காக உங்களை என்னுடைய பிள்ளைகள் என்று அழைக்கிறேன்.

நீங்கள் என்னை பிதா என்றும் தகப்பன் என்றும் அழைக்கும்படி உங்களுக்குள்ளே புத்திர சுவீகாரத்தின் ஆவியை தந்திருக்கிறேன். இந்த நாள் வரை உங்களைக் காத்தேன். இனிமேலும் உங்களைக் காப்பேன். என் நீதியின் வலது கரம் உங்கள் மேல் இருக்கிறது. பூமியின் தீமைகள் ஒன்றும் உங்களை அணுகுவதில்லை. என் இரத்தத்தின் மறைவில் உங்களை வைத்திருப்பேன். உங்களுக்கு நான் தந்தருளின மேகம் போன்ற திரளான வாக்குத்தத்தங்களை உங்கள் வாழ்க்கையில் நிறைவேற்றுவேன். இந்த நாள்வரை நிறைவேற வில்லையே என காத்திருக்கிற அனைத்து நன்மைகளும் இந்த புதிய ஆண்டிலே உங்களுக்கு நான் நிறைவேற்றுவேன். எனக்குள்ளே திடன்கொள்ளுங்கள். எனக்குள்ளே நான் வைத்திருக்கிற நன்மைகள் உங்கள் அறிவுக்கெட்டாதது. உங்கள் எண்ணத்திற்கும் மேலானது.

உலக ஜனங்கள் ஒருவரும் சிந்தித்துப் பார்க்காத மேன்மையை உங்களுக்கு வைத்திருக்கிறேன். நீங்கள் கூப்பிடும் போதே உங்களுக்கு பதில் தருவேன். உங்கள் இருதயம் கலங்காதிருப்பதாக. என் மகிமையினாலே நீங்கள் மூடப்படுவீர்கள். இந்த திருச்சபையை என் மகிமைக்கென்று தெரிந்திருக்கிறேன். இந்த திருச்சபையின் மூலமாக என் நாமம் தேசங்களிலே மகிமைப்படுத்துவேன். உங்களைக் குறித்தும் இந்த திருச்சபையைக் குறித்தும் நான் வைத்திருக்கிற திட்டங்களை நிறைவேற்றுவேன்.

நீங்கள் அறியாத மேன்மையை இந்த திருச்சபையிலே நான் கொண்டு வருவேன். துக்கத்துக்கும், துன்பத்துக்கும் நீங்கள் விலக்கி காக்கப்படுவீர்கள். உங்களை நெருங்கி கெர்ச்சிக்கிற சிங்கம் போல வருகிற சத்துரு மடங்கடிக்கப்பட்டு, தோற்கடிக்கப்பட்டு, புறமுதுகு காட்டி ஓடத்தக்கதாக என்னுடைய மகிமை உங்களை சூழ்ந்திருக்கும். பூலோகத்தின் பாரமான காரியங்கள் உங்கள் இருதயத்தை வேதனைப்படுத்தாதபடி என்னுடைய சமூகம் உங்களோடு கூட இருக்கும். இந்த தேசத்தில் ஒரு எழுப்புதலைக் கொண்டு வருவேன். திருச்சபைகளில் மறுமலர்ச்சியை கொண்டு வருவேன். எங்கும் சபைகள் விருத்தியடையும். எங்கும் சபைகள் புதிதாய் தோன்றும். கிழக்கிலும், மேற்கிலும், வடக்கிலும், தெற்கிலும் இருந்து இந்த திருச்சபையில் சேர்வதற்காக, பங்கெடுப்பதற்காக, திரளான ஜனங்கள் வருவார்கள். பின்னிட்டுப் போன ஜனங்கள் அனைவரும் திரும்பி வரத்தக்கதாக அவர்களுடைய இருதயத்தில் ஏவுதலை தருவேன்.

ஆவியை உயிர்ப்பிப்பேன். சத்துவத்தை பெருகப்பண்ணுவேன். என் ஆவியின் வரங்களினாலே உங்களை நிரப்புவேன். உங்கள் வீடுகளிலும், வேலை ஸ்தலங்களிலும் உங்கள் கல்விக் கூடங்களிலும் செல்லுகிற இடங்களிலெல்லாம் என் மகிமை உங்களை சூழ்ந்திருக்கிறதை உலக ஜனங்கள் காணத்தக்கதாக என்னுடைய பிரசன்னம் உங்களோடு கூட இருக்கும்.

என்னுடைய சமாதானம் உங்களுடைய இருதயத்தை, இல்லத்தை, வேலை ஸ்தலத்தை, தெருக்கூடத்தை நிரப்பும். உங்களுக்குச் சமாதானத்தைக் கட்டளையிடுவேன். இந்த மதுரை பட்டணத்திலே நான் ஒரு எழுப்புதலைக் கொண்டு வருவேன். அந்தகார கிரியைகள் உங்கள் பிள்ளைகளை விட்டு விலகி ஓடும். விக்கிரகத்தை தேடி விக்கிரகத்தை வணங்குகிறவர்கள் பலர் வெறுமையாய் திரும்புகிறோம் என்பது போல இந்த பட்டணத்தின் அந்தகார ஆவிகளை எல்லையை விட்டு அகற்றுவேன். என் மகிமை இந்த பட்டணத்தை மூடும். உங்களில் ஒவ்வொருவரிலும் என்னுடைய வல்லமையை விளங்கப்பண்ணுவேன். திரளான ஜனங்களுடைய நோய்கள் அகன்று போகும். நீங்கள் கைகளை வைப்பீர்கள், அவர்கள் சொஸ்தமாவார்கள். நீங்கள் பிசாசுகளை விரட்டுவீர்கள். அவர்கள் விடுதலையாவார்களற். உங்கள் வாழ்க்கையிலே நான் புதிய காரியத்தை செய்வேன்.

இராஜாக்களின் இருதயத்தை திருப்புகிற தேவன் நான் என்று நீங்கள் அறியத்தக்கதாக இந்த பட்டணத்தில் ஒரு பெரும் மாற்றம் உண்டாகும். இதுவரையில் இருந்த வசதிகளைக் காட்டிலும் வசதிகளை இந்தப் பட்டணத்தில் பெருகப்பண்ணுவேன். சென்னை பட்டணத்தைப் போல இந்த பட்டணமும் பெரியதாக மாறும். எல்லைகள் விஸ்தாரம் பண்ணப்படும்.

திரளான வசதிகள் இந்தப் பட்டணத்தில் பெருகும். நான் அநேக தொழிற் கூடங்களை உருவாக்குவேன். அதற்காக ஜனங்களை இந்த தேசத்திலிருந்தும் பல மாநிலங்களிலிருந்தும் பல நாடுகளிலிருந்தும் கொண்டு வருவேன். திட்டமிடப்பட்டு செயல்படாமல் அடைக்கப்பட்டிருக்கிற, வறுமைக் கோட்டிற்குக் கீழ் இருந்த பெருங்கூட்ட ஜனங்கள் வறுமைக் கோட்டிற்கு மேலாக உயர்த்தப்படுவார்கள். குறைகள் எல்லாம் அகற்றப்படும்.

இந்தப் பட்டணத்தின் வறுமைகள் நீக்கப்படும். என்னுடைய செக்கினா மகிமை இந்த பட்டணத்தின் மேல் நிழலிடுகிறதை நீங்கள் காண்பீர்கள். இதுவரை கேள்விப்பட்டிராத சாட்சிகளை பலர் மூலம் கேள்விப்படுவீர்கள். அதிசயமான செய்கைகளை நான் இந்தப் பட்டணத்தில் செய்வேன்.